O Grupo Municipal Socialista de Rianxo emitiu un comunicado no que sostén que o Concello está a incumprir o servizo de recollida da 5ª fracción de residuos, “que fora anunciado polo propio alcalde no pleno para o 1 de setembro de 2025, en colaboración cos concellos de Pobra e Boiro”. No comunicado sinalan que “a realidade a día de hoxe é que o servizo non se puxo en marcha, incumprindo non só un compromiso público coa veciñanza, senón tamén a normativa estatal e europea, que establecía o 31 de decembro de 2023 como data límite para ter implantada a recollida separada de biorresiduos”.
O PSOE advirte que “os colectores adquiridos para este servizo están sendo empregados para outros usos, sen control, e atópanse nun estado de evidente deterioro, polo que, cando finalmente se active a 5ª fracción, os veciños e veciñas volverán atoparse con colectores rotos e en malas condicións”.
Os socialistas tamén din que nos últimos días detectaron que o servizo de recollida de lixo cesou de realizar o coñecido como “bolseo” en puntos concretos, “onde os veciños tiñan dificultade de levar as bolsas ós contedores habituais e dispuñan de contedores alternativos, e que o camión recollía, así como a recollida en determinados puntos habituais, que se viñan utilizando por cuestións de dificultade de acceso, distancia ou ausencia de pasos peonís seguros”.
Lembrar que a quinta fracción alude ao lixo que debe ser botado no contador marrón, destinado a refugar soamente residuos orgánicos biodegradábeis de orixe vexetal e/ou animal: materia prima para elaborar compost. Algúns exemplos de que pódese refugar no contedor marrón son: desperdicios de froita e verdura como peles, cascas ou sobras de comida; residuos de carne, peixe e pan; cascas de ovo, marisco, espiñas ou froitos secos; pousos de café e infusións; ou pequenos restos de xardinería.
