A entidade pública forestal SEAGA comezou esta semana os traballos de roza dunhas 350 parcelas particulares das parroquias de Isorna e Leiro, segundo confirmou o alcalde rianxeiro Julián Bustelo. Trátase de parcelas situadas en faixas de protección cuxos titulares asinaron previamente un convenio con esta entidade para a execución destes traballos de limpeza.
O rexedor explicou que o Concello solicitou nunha xuntanza co persoal técnico de SEAGA celebrada este mesmo mes de setembro, no marco do convenio asinado entre a FEGAMP e a Administración autonómica, a inclusión das restantes parroquias do municipio – Araño, Taragoña, Rianxo e Asados – nas denominadas “parroquias priorizadas”. Desta maneira os veciños e veciñas titulares de parcelas situadas en faixas poderán acceder tamén a este tipo de acordos.
O Concello engadiu tamén que dende o Concello de Rianxo se lle trasladará en datas vindeiras á Consellería de Medio Rural unha serie de expedientes relativos a fincas cuxos propietarios e propietarias veñen incumprindo de maneira reiterada a obriga de mantelas limpas. A Consellería de Medio Rural, a través tamén de SEAGA, poderá efectuar de maneira subsidiaria as limpezas trasladándolle posteriormente os custos ás persoas titulares.
