Este venres 19 de setembro celebrarase en Boiro un novo espectáculo familiar para a rapazada: unha cita co Mago Rafa baixo o título Experiencias en familia. A sesión dará comezo ás 19.30 horas na rúa peonil, diante do Mercado Municipal.
Experiencias en familia é un espectáculo de arredor dunha hora para, en palabras do Mago Rafa, “rirnos, sorprendernos e compartir”. É ademais unha proposta máxica e interactiva, pensada para que grandes e pequenos vivan momentos inesquecíbeis: cada espectador converterase, de feito, nunha parte fundamental do show. O Mago Rafa é un ilusionista de Lugo que leva máis de dúas décadas mostrándonos a vertente máxica dos obxectos comúns.
