O deporte noiés volveu facer historia esta pasada fin de semana. O mozo noiés Miguel Castiñeira Castro, do Club ITF Noia, vén de proclamarse campión de Europa no Campionato de Europa Wako celebrado en Jesolo (Italia), representando á selección española.
Tras unha tempada chea de esforzo e grandes resultados, Miguel acadou finalmente a recompensa máxima, impoñéndose na categoría cadete menor -52 kg nas modalidades de light contact e kicklight.
O Campionato de Europa de Kickboxing celebrouse entre o 12 e o 21 de setembro en Italia, na cidade de Jesolo.
En ambas as modalidades Miguel comezou na rolda de dezaseisavos.
En kicklight empezou gañando a Irlanda e Bulgaria, cedendo ante Italia nos cuartos de final nun combate axustado e quedando ás portas das medallas.
Na modalidade de light contact tamén arrancou nos dezaseisavos contra Irlanda, á que venceu de maneira contundente, resultado que repetiría combate tras combate gañando a rivais de toda Europa e con maior experiencia internacional e mellor colocados no ranking mundial. Desta forma, venceu a Gran Bretaña nos oitavos, a Bulgaria en cuartos e a Eslovenia por partida dobre en semifinais e final para conseguir o ouro e coroarse como campión de Europa de light contact 2025.
En palabras do club, “este resultado é froito do traballo incansable durante numerosos adestramentos e competicións que Miguel acumula á súa corta idade de 14 anos e desde o club solo nos queda darlle a noraboa por este resultado e animalo a continuar con esta actitude”.
