O Concello de Rois activará o vindeiro luns, 8 de setembro, o servizo de Ludoteca escolar no CPI Os Dices, co obxectivo de facilitar a conciliación das familias xa dende o primeiro día de clase.
O programa funcionará inicialmente en horario de 14.40 a 16.40 horas durante o mes de setembro, coincidindo coa saída do alumnado. A partir de outubro, o horario podería variar en función da programación definitiva das actividades deportivas e culturais municipais.
Ademais, o Concello ofrece tamén a posibilidade de abrir a Ludoteca no colexio de Urdilde a partir de outubro, sempre que se inscriba un número mínimo de menores. O prazo de matrícula continúa aberto para as familias interesadas.
Desde o Concello lembran que os nenos e nenas que participen na Ludoteca do CPI Os Dices non poderán utilizar o transporte escolar á saída do centro. As familias deberán comunicar á dirección os días nos que non empreguen o autobús, entregando o formulario habilitado antes do luns a primeira hora. Do mesmo xeito, aquelas que non utilicen transporte deberán presentar unha autorización para que o persoal da Ludoteca poida recoller aos menores.
Con esta iniciativa, o Concello de Rois busca reforzar os servizos de conciliación e apoiar ás familias no inicio do novo curso escolar.
