O Concello de Rianxo dá continuidade ao seu Programa de Envellecemento Activo e abre as inscricións para o novo curso 2025/2026, con actividades (gratuítas) a desenvolver dende este mes de setembro até o mes de xuño de 2026. Este programa, que comezou como un proxecto piloto na parroquia de Rianxo, está orientado a “ampliar a esperanza de vida activa e saudábel para persoas maiores”, informou o Concello, engadindo que tamén se busca “contribuír a aumentar o máximo posíbel a súa autonomía persoal á vez que serve como medida de detección precoz de posibles deterioros cognitivos”. Entre as novidades deste curso que axiña comeza está o cambio de horario dos grupos de Taragoña e Leiro, así como a ampliación dos grupos en Isorna. Ademais, en marzo do ano pasado o Concello achegou un investimento de algo máis de 11.000€ para chegar a máis parroquias e dar servizo a preto dun centenar de persoas.
