A Xunta de Galicia vén de licitar por case 28 millóns de euros o proxecto e execución das obras de ampliación da estación depuradora de augas residuais (EDAR) de Vilagarcía de Arousa. As empresas interesadas poderán presentar as súas ofertas ata o 9 de decembro.
O obxectivo da actuación é solucionar as carencias da actual instalación e garantir o cumprimento dos límites de vertedura. O financiamento correrá a cargo de Augas de Galicia, que achegará o 80% do orzamento, e do Concello de Vilagarcía, que aportará o 20% restante. Ademais, a obra estará cofinanciada a través do Fondo Europeo de Desenvolvemento Rexional (Feder) no marco do programa Galicia Feder 2021-2027.
Coa ampliación prevista, a futura EDAR pasará de atender a 46.000 habitantes equivalentes a dar servizo a preto de 100.000, sumando poboación fixa, estacional e achegas industriais. Así, duplicarase a súa capacidade e poderanse resolver os principais problemas detectados na infraestrutura actual, como a insuficiencia hidráulica e de tratamento de cargas e lodos.
As obras, que deberán ser compatibles co funcionamento da depuradora, inclúen a construción de novas liñas de auga, lodos e biogás. Entre outras melloras, instalaranse procesos de pretratamento con desodorización, novo tratamento biolóxico, decantación secundaria, desinfección terciaria e eliminación química de fósforo. Tamén se prevé un novo bombeo ao emisario submarino e a revisión do actual.
Unha vez completadas, as instalacións poderán xestionar 500 litros por segundo fronte aos 250 actuais, optimizando o funcionamento en tempo de choiva.
Esta actuación enmárcase na colaboración técnica e económica de Augas de Galicia cos concellos para mellorar a xestión do ciclo integral da auga, garantir o bo estado ecolóxico de ríos e rías e reducir a pegada hídrica mediante investimentos en redes de saneamento, depuración e abastecemento.
