Esta fin de semana o núcleo de Manselle (Dodro) vai acoller a nova edición do certame musical e cultural Festivalo. Baixo o lema Resistencia e Alegría a cita propón unha xornada de música e diversión para subliñar nas nosas axendas.
Vimbio, pertencente ao Programa Rede Cultural 2025 da Deputación da Coruña, e Five Star Service serán os cabezas de cartel dun festival cheo de grandes artistas, como por exemplo Cé Orquestra Pantasma, Xairo D’Herbón, Maruxa e Coralia, Foliada do Montiño, Cantareiras do Montiño, Acción Artística Galeoska e Regueifeiras de Dodro.
A sesión vermú estará amenizada por La Fabulosa.
Haberá actividade gastronómica a través de foodtrucks.
A cita será o sábado 27 de setembro.
O Festival o é un certame musical que naceu en 2010 e que debe o seu nome ao feito de que se celebra nos terreos que conquistou para o comunal o valo construído polos veciños de Manselle. Foi, en palabras da veciñanza, “un evento que xurdiu con vocación de por en valor e desfrutar a música contemporánea e tradicional en galego, sobre todo da comarca do Sar, e polo que pasaron grupos sobranceiros como Ruxe Ruxe ou Labregos no Tempo dos Sputniks”.
