Quen queira danza, vaina desfrutar a tope esta fin de semana en Boiro, grazas ao programa Mes da Danza, que ofrece tres novas xornadas temáticas o venres 19, o sábado 20 e o domingo 21. Actuarán grupos locais e compañías profesionais.
A axenda incluíu xa as actuacións da escola de ballet Cen Pliés no Pazo de Goiáns (o pasado venres 5 de setembro), o Encontro Tradicional de San Roque organizado por Abeloura en San Roque (Cespón) o sábado 6, a actuación do Ballet Folclórico Galego o domingo 7, e máis actuacións de Xilbarbeira e Abeloura en Goiáns, o domingo 14.
O venres 19 ás 20.30 horas tamén no Pazo de Goiáns terá lugar a actuación de Aroña xunto co Grup Folkcloric Tramuntana, de Menorca; o sábado 20 á mesma hora será Fran Sieira con Ceibe e o domingo 21 ás 19.00 horas actuación do grupo de ballet de Aroña.
O mes da danza 2025 do Concello de Boiro remata o sábado 27 de setembro co serán das Angustias. As actuacións do mes da danza contarán cunha entrada solidaria de 3 euros que serán doados a distintas entidades e asociacións do ámbito social.
