A maioría dos cidadáns, que se dedican a traballar e a cotizar, non entenden como algúns gobernantes da Xunta de Galicia, concretamente desde a Consellería de Sanidade e de Educación, non se poñen as pilas para garantir o persoal axeitado para os diferentes centros de saúde ou hospitalarios así como os centros educativos.
En Ribeira, concretamente nos últimos tempos, estase a vivir con angustia e decepción a falta de médicos no centro de saúde e o hospital comarcal do Barbanza, así como a carencia de profesores nalgúns centros educativos, como o Grupo. A sanidade e a educación públicas son piares fundamentais de calquera sociedade avanzada e democrática. Limitar os recursos e a falta de compromiso é un erro político, que a sociedade debe corrixir.
As plataformas en defensa da sanidade pública e moito anpas, de nais e pais de alumnos, están a alertar do desmantelamento de moitos dos nosos servizos públicos, por parte da Xunta de Galicia, quizais para beneficiar ás clínicas ou centros privados sanitarios e aos colexios privados, aos que non todo o mundo pode acudir aínda que quixese.
