O presidente da Asociación Rural de Desenvolvemento (ARD) Ría da Estrela e da Asociación de Concellos do Camiño da Ría de Muros Noia, Luís Oujo, mantivo esta mañá unha reunión de traballo co alcalde de Noia, Francisco Pérez, e o tenente de alcalde, Manuel Seijas, para analizar o grao de desenvolvemento das actuacións incluídas no Plan de Sustentabilidade Turística en Destino (PSTD) da Ría de Muros Noia.
Segundo explicou Oujo, o encontro serviu para avaliar “o bo ritmo das obras recollidas no PSTD, xa que son executadas polo Concello de Noia”. O plan ten como obxectivo poñer en valor os recursos e atractivos da zona e converter a Ría da Estrela nun destino turístico competitivo, fomentando novos produtos que axuden a desestacionalizar e diferenciar a oferta turística.
O PSTD da Ría de Muros Noia conta cun investimento de 2,3 millóns de euros, financiados pola Unión Europea a través dos fondos Next Generation EU, e estrutúrase en catro eixos: transición verde e sostible, mellora da eficiencia enerxética, transición dixital e competitividade.
Na reunión analizáronse, entre outras actuacións, o estado da senda litoral da Ría da Estrela —con obras xa finalizadas en Muros, a piques de rematar en Outes e a iniciar proximamente en Porto do Son—, así como os traballos de restauración ambiental e paisaxística de tramos do Camiño de Santiago da Ría de Muros Noia, a adecuación da contorna da Chaínza e a dixitalización da información do xeodestino.
Tras esta primeira toma de contacto, celebrada hoxe en Porto do Son, mañá xoves terá lugar unha segunda reunión na Casa Consistorial de Noia, na que os técnicos de ambas entidades analizarán con detalle o nivel de desenvolvemento do PSTD.
Oujo aproveitou para agradecer ao alcalde e ao tenente de alcalde de Noia a súa disposición a acoller os encontros da ARD e da Asociación de Concellos do Camiño na Casa do Concello, “xa que, por unha cuestión de centralidade e desprazamento, é o que máis facilita a participación dos cinco municipios da Ría da Estrela”.
