A Comisión pola Recuperación da Memoria Histórica do Barbanza e o BNG seguen a xuntar forzas para “continuar co labor de dignificar ás vítimas da represión franquista na nosa comarca”. Segundo confirmaron as dúas entidades, este ano daranse pasos importantes na restitución e na lembranza das persoas asasinadas ou represaliadas polo fascismo, como por exemplo a exhumación de Vicente López Novo “Rufino”, veciño de Ribeira e militante da CNT, asasinado en 1948 pola Garda Civil por loitar na resistencia antifranquista da V Agrupación Guerrilleira de Galicia.
Tamén serán levadas a cabo iniciativas para recuperar a memoria e honrar publicamente aos irmáns Enrique e Manuel Fernández Sendón, tamén de Ribeira, en palabras das dúas entidades “referentes na loita pola liberdade, o pensamento crítico e os ideais republicanos”.
Estes tres nomes, engadiron, representan “o compromiso dunha xeración que deu a vida por unha Galiza libre, xusta e democrática”.
Desde o BNG confirmaron que seguirán a traballar para “que nunca máis se borren da historia os nomes de quen loitou contra o fascismo”.
