A agrupación política UCIN Boiro criticou este a xestión do goberno local socialista ante os cortes de subministro de auga que se veñen producindo no municipio durante o verán. Segundo a formación, os veciños e turistas están a sufrir interrupcións “sen previo aviso, sen horarios definidos e sen explicacións oficiais”, ao tempo que seguen recibindo os recibos municipais.
UCIN asegura que a situación está a afectar a familias, establecementos de hostalaría e aloxamentos turísticos, cun impacto negativo tamén na imaxe de Boiro como destino vacacional.
A formación esixe ao executivo local que ofreza explicacións públicas sobre as causas dos cortes, que publique de forma periódica os niveis de auga dos depósitos municipais e que estableza un plan de comunicación con avisos previos e notificacións en tempo real. Reclaman tamén que se permita á cidadanía comprobar directamente o estado dos depósitos.
“Os veciños pagan os seus impostos e merecen servizos dignos, non escusas nin silencios”, sinalou UCIN, que acusa ao goberno local de “deixadez” e comprométese a seguir defendendo o dereito da veciñanza a servizos públicos fiables e de calidade.
