O festival de monicreques tradicionais Titiriberia, organizado pola asociación Morreu o Demo co apoio do Concello de Rianxo, a Xunta de Galicia, a Deputación da Coruña e o INAEM, celebra en Rianxo a súa décima edición entre o 12 e 17 de agosto. Este ano, o programa inclúe unha trintena de espectáculos da man de 19 compañías procedentes de Galicia, Portugal, Euskadi, Navarra, Aragón e Valencia. A actividade continúa este mércores 13 de agosto con funcións na praia de Tanxil, no Campo de Arriba e no Paseo da Ribeira.
Ás 12.30 horas, Títeres Alakrán ofrecerá A vella do gaiteiro, unha ruada de Títeres Alakrán no que se utiliza unha figura tallada para crear a ilusión dunha dona que leva un gaiteiro nun cesto. A música que interpreta vai acompañada de diálogos cómicos e dramatizacións coa figura, xerando asombro e risa entre o público. O percorrido deste espectáculo itinerante partirá do Paseo da Ribeira.
Ás 13.00 horas, a praia de Tanxil recibirá a Basoa, obra da formación navarra Firulete. Esta montaxe fálanos de Uxue quen, preocupada pola súa avoa, meterase no bosque na súa procura. Entre as árbores atoparase con seres mitolóxicos que lle ensinarán valiosas leccións.
Ás 20.00 horas, no Campo de Arriba, chegaralle a quenda á compañía portuguesa Red Cloud, que presentará o seu espectáculo O castelo dos pantasmas. A partir do conto popular “Xan sen medo”, Roberto explora un espazo físico, xeográfico e mental, nun castelo encantado enfrontándose a diferentes pantasmas e monstros na procura da princesa Rita.
A compañía vasca Tenderete tiña previsto ofrecer dúas funcións no día de mañá do seu espectáculo Menudencias, mais por imprevistos de forza maior de última hora se suspenden.
