Ribeira conta este mércores cos servizos mínimos pola folga do SAF. Así o confirmou o alcalde, Luís Pérez Barral, informando da actividade limitada que se está a achegar á cidadanía ante a folga prevista en Galicia para este 13 de agosto. O rexedor manifestou a importancia deste servizo que definiu de “básico e elemental para o coidado das persoas maiores”. Dito servizo foi creado hai 16 anos, en concreto no ano 2009. Pérez Barral salientou que o SAF supón unha “competencia impropia da administración local”, argumentando que non deberían ser os concellos os que estean administrándoa: “O SAF implica un custo que repercute nas arcas públicas municipais, no caso de Ribeira supón máis de medio millón de euros anuais que debemos poñer de fondos propios”. O alcalde tamén deixou claro que segundo a propia lei esta competencia debería asumila a partes iguais, o Estado e a Xunta de Galicia.
Pérez Barral tivo palabras para as traballadoras do SAF, concretamente lembrou a traballadora asasinada no concello do Porriño: “O sucedido lévanos
ás administracións locais a esixir que a Xunta de Galicia volva recuperar a necesidade de elaborar os informes técnicos que avalíen en que domicilios se poden facer estes servizos e tamén con que prestacións porque as traballadoras de axuda no fogar deberían ter tódalas garantías de seguridade e tamén ver melloradas as súas condicións laborais”.
Barral informou tamén que dende a Federación de Galega de Municipios e Provincias (FEGAMP) está en conversas coa Xunta de Galicia, “para equipar o custo real do servizo porque ata do agora a Xunta está dando 12 euros aproximadamente por hora e o custo real do servizo pasa dos 22 euros”. En
resumo, estase a reclamar que se cumpra a Lei de Dependencia que “significa que as dúas administracións –Estado e Xunta– se comprometan a financiar este servizo esencial para a cidadanía.
Con respecto á folga, anunciou que o Concello de Ribeira asinou un decreto para poder garantir uns servizos mínimos –aseo, alimentación e
mobilidade– e que os horarios poden verse alterados pola propia folga.
