Coma todos os anos, por estas datas, os montes quéimanse. Os bombeiros comarcais levan anos reivindicando mellores condicións laborais e salariais. Algúns propietarios de leiras e zonas forestais continúan sen limpar incumprindo coa legalidade. As diferentes administracións públicas están a mirar para outro lado, obrigando a limpeza aos cidadáns, mentres os montes forestais están sen limpar, sen devasas, é dicir, nun estado apropiado para que, en caso de incendio, poida prexudicar ás propiedades privadas, vivendas, vehículos e mesmo ás persoas.
Non pode ser que os encargados de apagar os lumes, como poden ser os bombeiros, estean nunha situación tan precaria, percibindo retribucións salariais de pouco máis do salario mínimo interprofesional, sen apenas medios materiais e cuns poucos meses de traballo ao ano. Así non se pode actuar contra o lume.
Tampouco é de recibo que a Xunta de Galicia, non dispoña dunha maior delegación e coordinación coas propias comunidades de montes e cos concellos, que son os máis próximos ao territorio e os que poden actuar con maior eficacia, a condición de que dispoñan dos medios materiais e de financiamento necesarios.
O medio ambiente e a contorna natural é un patrimonio de todos e non de ninguén en particular, de aí a importancia de preservalo e de previr ante calquera tipo de agresión cara ao mesmo.
