As candorcas comprometeron a regata longa e por motivos de seguridadeo Real de Portosín cambiou o percorrido
A localidade de Portosín converteuse esta fin de semana no epicentro da vela pesada en Galicia coa celebración da Regata Mar de Finisterre – Trofeo Pitusa Sabín, organizada polo Real Club Náutico sonense. A cita, puntuable para a Copa de Galicia de Clubes, o Trofeo Presidente Xunta de Galicia – Circuito de Alto Nivel e tamén clasificatoria para o Campionato de España de Cruceiros, reuniu preto de 40 embarcacións de gran nivel competitivo.
A xornada do sábado estaba prevista como unha travesía de 35 millas náuticas ata a enseada de Fisterra, pasando polo Carrumeiro Chico. Porén, a escasa previsión de vento e, sobre todo, o avistamento de candorcas nas proximidades de Corrubedo, obrigaron ao comité, presidido por Sergio del Río e co oficial principal Juan Insua, a modificar o percorrido e limitar a proba ao interior da ría de Muros e Noia.
Os Open competiron segundo o trazado establecido nas instrucións de regata, mentres que os ORC tiveron que completar un circuíto semellante pero con dúas voltas. O vento, estable do suroeste con 6-8 nós, permitiu o desenvolvemento normal da proba.
No apartado deportivo, o Urbapaz, de Fran Edreira (CN Cabanas), destacou sobre o Mirfak, de Diego López (Armada Española, Ferrol). Ambos chegan empatados tras repartirse os triunfos nas dúas primeiras citas do Trofeo Presidente Xunta de Galicia. O Bon III, de Víctor Carrión (CN Punta Lagoa), ocupa a terceira posición tanto na xeral de ORC como na combinada 1-3.
En ORC 4-5, a vitoria foi para o Bacor, de Francisco Villamil (CN Portosín), seguido do Deep Blue, de Vicente Cid (RCN Vigo), e do Monterrei, de Paula Fernández (CN Portosín). Nos Open, lidera o Camping Ría de Arousa, de José Manuel Pombar (CN Arousa Norte), por diante de O Montaráz, de José Carlos Costas (Portosín), e do Monte Ulía, de Eduardo Arán (Portosín).
A competición continúa este domingo, cunha saída prevista ás 11:00 horas. Os Open disputarán unha regata costeira no interior da ría, mentres que os ORC afrontarán dúas probas barlovento-sotavento. A entrega de premios está programada para as 17:30 horas nas instalacións do club anfitrión.
