O III Torneo Solidario Interparroquial celebrado o pasado 28 de xuño en Vista Alegre, Boiro, recadou 10.329 euros para ASANOG, a Asociación de Cáncer Infantil e Xuvenil de Galicia. O alcalde, José Ramón Romero, participou xunto coa directora de Relacións Institucionais de JEALSA e integrante de ASANOG, Margarita Hermo, acompañados de Lara Buig e Chuco Otero (representantes de ASANOG), na entrega do cheque simbólico que recolleu Vanessa Vidueiros por parte da asociación.
Margarita Hermo agradeceu, en nome da organización, “a colaboración das empresas e comercios que doaron agasallos para os sorteos e tamén de toda a xente de Boiro que se achegou ao partido e gracias á que se puido recadar esta cifra para ASANOG”.
“Esta doazón é unha mostra de compromiso e solidariedade con ASANOG, unha entidade composta por un equipo de profesionais que presta apoio ás familias de nenas e nenos con cancro nas distintas etapas”, recoñeceu Vanessa Vidueiros.
ASANOG leva 13 anos prestando apoio económico, psicolóxico e de acompañamento ás familias.
O alcalde, José Ramón Romero, agradeceu a toda a organización “por esta iniciativa solidaria que logrou recadar unha cifra importante destinada a contribuír ao gran traballo que diariamente fai ASANOG”.
