A xunta de Goberno local do Concello de Rianxo vén de aprobar as bases da convocatoria de axudas para a adquisición de material escolar destinadas ao alumnado de Educación Infantil e Ensino Obrigatorio do municipio.
A contía máxima das axudas será de 300€ para dispositivos electrónicos, 50€ para material escolar e 75€ para roupa deportiva.
“As familias poderán investir as axudas na compra de material necesario para o desenvolvemento da actividade do alumnado no curso escolar que axiña comeza”, sinalou o alcalde, Julián Bustelo.
Bustelo tamén recordou que na convocatoria correspondente ao curso 2024/2025 concedéronse axudas por un importe total de 10.507€, “máis do dobre que o importe correspondente ao curso 2022/2023, o que se traduce nun aumento de máis do 50% das persoas beneficiarias”, sinalou, lembrando que o prazo de presentación de solicitudes será de quince días hábiles a partir da publicación das bases da convocatoria no Boletín Oficial da Provincia.
