A xunta de Goberno local do Concello de Boiro aprobou a adxudicación das obras para a construción de beirarrúas e carril bici na avenida da Constitución, entre a av. de Compostela e a rúa Salvador Allende. O importe das actuacións a desenvolver ascende aos 199.240,61 euros e contan co financiamento da Deputación da Coruña mediante o POS+ de Obras e Servizos.
As actuacións que se pretenden leva a cabo contemplan “a construción de beirarrúas de soleira de formigón e baldosa hidráulica nunha zona do núcleo urbano onde non existen na actualidade con abundante tránsito de peóns e zona de paso do alumnado dos centros de ensino da avenida de Compostela”, explicou o Concello, engadindo que amais da beirarrúa vaise realizar un novo treito de carril bici que conecta co xa existente na rúa Salvador Allende e que chega á praia de Barraña.
Ademais, a actuación contempla a execución dunha rotonda na intersección da av. da Constitución coa rúa Salvador Allende para aumentar a seguridade viaria cunha maior fluidez do tráfico rodado. A actuación contempla a execución de canalizacións de saneamento, abastecemento de auga e electricidade así como a execución do de firme aglomerado que se completará co marcado viario.
