Malia os esforzos por reanimala, os servizos sanitarios só puideron confirmar o falecemento da persoa, que se metera na auga xunto con outro adulto e un menor. Estes dous resultaron feridos e foron trasladados ao Hospital Virxe da Xunqueira, en Cee.
O 112 Galicia tivo aviso deste suceso minutos antes das 16 horas, a través de varios particulares que alertaban de tres persoas, unha deles un neno, que se atopaban en dificultades tras meterse na auga na zona esquerda da praia de Lires (Cee).
De inmediato, activouse un dispositivo para o que se alertou a Urxencias Sanitarias de Galicia-061, Salvamento Marítimo, Servizo de Gardacostas de Galicia, Garda Civil e aos voluntarios de Protección Civil de Cee.
Os particulares que contactaron co 112 Galicia explicaron que os estaba levando a corrente e que a situación do mar era complicada. De feito, desde Salvamento Marítimo chegouse a mobilizar o helicóptero de rescate Helimer. Ata o lugar tamén se desprazou a aeronave medicalizada con base en Santiago de Urxencias Sanitarias de Galicia-061.
Con todo, pouco despois conseguiuse sacar da auga ás tres persoas. Unha delas, a muller, estaba inconsciente e os servizos sanitarios practicáronlle manobras de reanimación, aínda que finalmente só puideron confirmar o seu falecemento. Un home e o menor foron evacuados ao Hospital Virxe da Xunqueira.
