O Campo de Arriba do concello de Rianxo acolleu este 21 de agosto a presentación oficial da nova edición do circuíto 4 carreiras, 1 meta, promovido pola Mancomunidade Barbanza Arousa, formada polos concellos de Rianxo, Boiro, A Pobra e Ribeira.
No acto participaron Julián Bustelo, presidente da Mancomunidade e alcalde de Rianxo; o alcalde da Pobra do Caramiñal José Carlos Vidal e os concelleiros de deportes Xavi Vidal (Ribeira) e Marcos Fajardo (Boiro), así como persoal técnico deportivo dos concellos implicados.
Segundo explicaron, este proxecto consiste nun programa anual de carreiras populares que “busca fomentar a práctica do deporte ao aire libre, ao tempo que se promove o coñecemento dos atractivos naturais e culturais da zona Barbanza Arousa”. A iniciativa está organizada conxuntamente pola Mancomunidade Barbanza Arousa e os departamentos de deportes dos concellos de A Pobra do Caramiñal, Boiro, Rianxo e Ribeira.
“Desde a Mancomunidade animamos a toda a cidadanía a formar parte desta proposta que é moito máis ca unha carreira. É unha oportunidade para compartir, para gozar en familia, con categorías para todas as idades, e para descubrir o patrimonio dun lugar que paga a pena visitar”, declarou Julián Bustelo, presidente da Mancomunidade, engadindo que o circuíto forma parte da estratexia da Mancomunidade para “impulsar o turismo activo e de natureza durante todo o ano, contribuíndo así á desestacionalización da oferta turística”.
As probas discorren por contornas de gran valor paisaxístico e patrimonial, reforzando a imaxe do territorio como un destino atractivo os 365 días do ano.
O calendario do circuíto inclúe catro carreiras: a primeira celebrarase na Pobra do Caramiñal o 31 de agosto, seguirá en Ribeira o 27 de setembro, despois en Rianxo o 1 de novembro e finalizará en Boiro o 7 de decembro.
A participación está aberta a todo tipo de corredores e corredoras, tanto federados como non federados, con independencia da súa procedencia.
“Esta proposta deportiva segue medrando ano tras ano, o que favorece que cada vez máis visitantes, tanto de Galicia como doutras comunidades autónomas, se acheguen ao territorio”, sinalaron dende a Mancomunidade, apuntando que o obxectivo “é atraer ese turismo de proximidade que busca escapadas curtas ao longo do ano para gozar da gastronomía local, das rutas de sendeirismo, da paisaxe, miradoiros, museos e do patrimonio histórico”.
Ademais de premios económicos, entregaranse tamén experiencias turísticas no destino Barbanza Arousa, coa finalidade de seguir promovendo o territorio e crear unha rede de embaixadores do mesmo.
A inscrición no Circuíto realízase a través da web www.emesports.es. Para participar nas catro carreiras a data límite de inscrición é o vindeiro 28 de agosto ás 14:00h. Así mesmo, está contemplado participar no Circuíto asistindo a tres das catro carreiras polo que a data de inscrición prolóngase ata o 24 de setembro ás 23:59 horas.
