As bibliotecas municipais do Concello de Boiro contarán nos meses de setembro e outubro con actividades do programa Ler Conta Moito promovido pola Xunta de Galicia (Consellería de Cultura) para a dinamización da lectura.
A Axencia de Lectura Municipal de Escarabote contará coa actividade Os contos da leiteira o vindeiro 28 de agosto ás 12.00 horas; O grúfalo de Carmen Domenech o 4 de setembro ás 20.00 horas; e Circo na biblioteca de Daniel Blanco o 11 de setembro ás 20.00 horas.
Na Biblioteca Municipal de Boiro, que provisionalmente se atopa no Centro Social de Boiro, o 3 de outubro ás 20.00 horas terá lugar A historia máis monstruosa de Proyecto Bululú SL; o 10 de outubro ás 20.00 horas Contos con xeito de Bea Campos; e o 11 de outubro ás 12.00 horas A cabeza aos pés de Charo Pita.
Ler Conta Moito ten como obxectivo xeral animar á lectura a través dunha programación de actividades atractivas, vinculadas aos intereses dos distintos colectivos, que faciliten o achegamento aos espazos bibliotecarios.
