Na mañá deste 22 de agosto arrincaron oficialmente as Festas de San Bartolomeu, edición 2025, e fixérono da man da Banda de Música de Noia, que está a celebrar os seus 135 anos de historia e que deleitou a veciños e visitantes, esta mañá, cunha ruada e asumiu a honra de dar o pregón na edición deste ano.
As festas celebraranse do 22 ao 26 de agosto cunha axenda de actividades ampliada respecto ás propostas avanzadas en semanas anteriores e introducindo cambios de localización nalgunhas das actividades máis destacadas.
Así, a programación inclúe unha importante presenza de artistas locais, como é o caso do grupo noiés As Lens que actuará o luns 25 ás 22:00h na praza do Tapal, ou a aparición do grupo de Cantos de Taberna Troula na Barquiña, encargados de animar a mañá do martes 26 polo centro histórico da localidade.
Outro dos cambios máis importantes afecta á actuación dos muradáns The Rapants e 9Louro, que por motivos de seguridade trasladarase ao patio do IES Campo de San Alberto. A cita, programada para o domingo 24 ás 22:00 horas, converterase nun dos pratos fortes desta edición. A entrada será de balde, con apertura de portas ás 20:30 horas e acceso libre ata completar aforo.
Máis actividades relevantes
O sábado 23 de agosto os protagonistas serán Óscar Ibañez & Tibo (na praza do Tapal a partir das 21.30 horas) e a Orquestra París de Noia (na Alameda ás 22.30 horas).
O domingo 24 de agosto, Día de San Bartolomeu, a música virá da man da Orquestra Tubo (na Alameda ás 21.00 horas) e dos muradáns The Rapants (no Tapal a partir das 22.00 horas).
O luns 25 de agosto, Día de San Lois, actuarán a Orquestra Combo Dominicano (na Alameda ás 21.30 horas) e Disco Móbil Chocolate (na Alameda ás 23.30 horas).
O martes 26 a vertente musical virá da man de A Misela (ás 21.00 horas no Curro) e da Orquestra Marbella (ás 22h na Alameda). Ás 0.00 será a quenda dos fogos artificiais, dende o peirao do Marqués.
O venres 29 de agosto celebrarase o Entroido de Verán e o domingo 31 a Escola de Danza Oitos representará o espectáculo As Portas do Mar (ás 20.00 horas no Coliseo Noela).
