As persoas usuarias da Asociación Ambar das Persoas con Diversidade Funcional puxeron o broche final á súa tempada de traballo cunha emotiva festa de verán o pasado venres 1 de agosto no Restaurante Baiuca de Ribeira. O evento, que serviu para dar a benvida ás vacacións de agosto, contou coa presenza de Begoña Abeijón Fernández, directora xeral de Persoas con Discapacidade da Xunta de Galicia.
A xornada de convivencia e lecer foi un espazo para que toda a familia de Ambar puidese celebrar o intenso traballo realizado durante o ano na promoción da inclusión social e laboral das persoas con diversidade funcional na comarca do Barbanza. Dende a asociación, quixeron manifestar o seu agradecemento á directora xeral, Begoña Abeijón, pola súa asistencia e polo seu compromiso co labor que a entidade desenvolve. “A súa presenza”, sinalaron dende Ambar, “é un claro sinal do apoio das administracións públicas ós esforzos por construír unha sociedade máis xusta e accesíbel para todas as persoas”.
Dende a dirección da asociación inclusiva con sede principal en Ribeira sinalaron que “coa chegada do mes de agosto, as persoas usuarias de Ambar inician un merecido descanso para recargar enerxías e volver con máis forza en setembro, cando o noso equipo regrese coa mesma ilusión e dedicación para continuar Impulsando vidas independentes en comunidade”.
