Boiro vai acoller esta semana dúas citas culturais para a rapazada.
O martes 12 de agosto, a partir das 21.00 horas, celebrarase unha cita co circo e coas disciplinas do clown urbano diante da Casa da Cultura, na avenida da Constitución. Será unha sesión para público infantil e familiar.
Ao día seguinte, mércores 13, proxectarase en Agramuíña (Escarabote) a partir das 22.00 horas o filme Salta!, tamén para público infantil e familiar. Salta! é un filme galego de Olga Osorio que nos conta a historia de Óscar e Teo (13 e 10 anos), dous irmáns, moi distintos entre si, que viven nun modesto piso de barrio. É o verán de 1989. Teo é futboleiro e un pouco traste, Óscar un sabichón que prefire pasar as tardes de verán estudando a teoría da relatividade. En realidade, cada un lida á súa maneira coa desaparición da súa nai, unha prometedora científica obsesionada cos buracos de verme.
