O xuíz da Audiencia Nacional Antonio Piña deu orde de abrir dilixencias previas pola querela presentada contra o primeiro ministro de Israel, Benjamin Netanyahu e outros altos mandos militares dese país, para responderen da abordaxe do barco Madleen, integrante da coñecida como “Frotiña da Liberdade”, rexistrada o pasado 9 de xuño en augas internacionais cando o buque se dirixía a Gaza con axuda humanitaria. A Audiencia abre unha investigación penal por crimes de guerra e de lesa humanidade contra o primeiro ministro israelí, o seu ministro de Exteriores e outros membros do exército.
O xulgado Central de Instrución número 6 da devandita Audiencia Nacional coida que os feitos denunciados revisten carácter delictivo, motivo polo que ordena incoar dilixencias para a súa jnvestigación.
A querela foi presentada por Sergio Toribio – único tripulante español a bordo do Madleen – e o Comité de Solidariedade coa Causa Árabe e cadra no tempo coa segunda visita que o primeiro ministro israelí realiza en menos de 24 horas ao presidente estadounidense Donald Trump, quen agasallou cunha cea ao mandatario israelí e recibiu a confirmación de Netanyahu de que o propuxera para recibir o Nobel da Paz, premio que xa lle fora outorgado tamén ao Secretario de Estado norteamericano Henri Kissinger en 1973.
A proposta do primeiro ministro israelí -que se espera non sexa aceptada- causou unha enorme sorpresa en todo o mundo. Máxime tendo en conta a negativa resposta mundial ao Nobel da Paz concedido a Kissinger. E agora, cunha figura tan polémica como a de Trump para a mesma distinción e a proposta de quen está considerado coma un xenocida a resposta non podía ser, supostamente, outra.
