A Porta do Sol de Ribeira converterase o vindeiro sábado 9 de agosto nun espazo de celebración da cultura alternativa coa cuarta edición de Xiradiscos, un evento que medra e se redefine este ano como Mercadiño Cultural. A cita foi presentada hoxe pola concelleira de Cultura, Antía Alberte, e a tesoureira da Asociación Xiradiscos, Nati Mirás.
A feira, que botará a andar ás 11:00 h, combinará arte, música, literatura e artesanía nunha xornada cargada de contido cultural e creatividade local. Máis de 13 postos de artistas e artesáns da comarca do Barbanza ofrecerán produtos feitos a man, vinilos, fanzines, ilustracións, deseño gráfico e pezas elaboradas con materiais reciclados, convertendo a rúa nun escaparate da cultura independente.
Un dos momentos destacados será a presentación do libro “Una historia del arte muy rápida” da artista palmeirana Carla Serrano, quen acadou notoriedade nas redes sociais polos seus vídeos divulgativos sobre historia da arte.
A xornada estará amenizada por música en directo dende a sesión vermú até ben entrada a noite. O programa inclúe:
- 13:00 h: Nan Îllonia (antes Chamaquito Pistolas), con sons enérxicos e eclécticos.
- 14:00 h: Pablo Leira, cantautor cun estilo americana.
- 22:30 h: concertos de Tesouro (power pop) e Superfuzz (rock & roll).
- 00:30 h: peche de festa con Nell, que mesturará música para bailar e finalizará cunha sesión de música lenta.
Durante a presentación, Nati Mirás salientou o orgullo de seguir adiante con esta proposta “que aposta firmemente pola cultura alternativa e independente” e agradeceu a colaboración do Concello de Ribeira e das empresas que apoian o evento. Tamén anunciou unha novidade ilusionante: a futura apertura dunha tenda de discos de vinilo en Ribeira, impulsada polo selo local Radix Records.
A concelleira Antía Alberte destacou que Xiradiscos “é un proxecto que enriquece a oferta cultural de Ribeira e promove o talento da comarca”. Ambas representantes animaron á veciñanza e visitantes a achegarse á Porta do Sol e participar nun evento “feito con moito cariño” e coa cultura como eixo vertebrador.
Máis información:
Lugar: Porta do Sol, Ribeira
Data: Sábado, 9 de agosto
Horario: Desde as 11:00 h ata a madrugada
Entrada libre
