E chegou finalmente, este xoves 24 de xullo, o día grande da Festa da Dorna, logo de xornadas épicas de homenaxe á tradición mariñeira (co Encontro de Embarcacións Tradicionais de Galicia), de exaltación da nosa música (co Orghullo Ghaiteiro do pasado sábado, no que participaron as bandas Suasebe, Os Enxebres de San Lázaro, Tahume, Laghareu, Trécola, Os Liantes, Riparia, Borja e Cía, Andavía, Río do Anxo, a Banda de Calo e Os Festas), a nova edición do Jran Prix de Carrilanas (o pasado domingo, cun novo desfile costa abaixo -na costa da Mámoa- de enxeños sacados do máis fondo da imaxinación dos participantes), o certame da Cansión de Tasca, o Trinautlón Dorneiro (na tarde do luns na praia de Area Secada) ou a XXXIII convocatoria do Voo sen Motor (este mércores 23 no porto do Ribeira), entre outros grandes acontecementos deportivo-culturais-marítimo-festeiros.
Este xoves 24, Día da Dorna, comezará ao agrande coa XXXV Reghata de Embarcasións Feitas á Machada e Propulsadas a Pan de Millo na praia de Coroso, con concentración previa, ao mediodía, na explanada do porto de Ribeira.
Logo da regata comezará a nova edición da Romaría Dorneira e pola noite, despois do gran desfile de todas as peñas polas rúas de Santa Uxía (o Top Secret) os noieses Monoulious Dop porán o broche de ouro á Festa da Dorna 2025.
