O Concello de Ribeira dá un paso firme cara á modernización e mellora da súa sinalética urbana coa execución do Plan Integral de Sinalización, tras a realización dun estudo previo adxudicado en outubro pasado.
O estudo identificou 154 sinais con necesidade de intervención, das cales un 70% son sinais illadas e a meirande parte concentranse na parroquia de Ribeira. Detectáronse múltiples problemas: sinais deterioradas, formatos diversos que xeran confusión, redundancias e falta de mantemento, especialmente nas comerciais. Destácase a situación da oficina de turismo, que presenta deficiencias de visibilidade e acceso, o que levou á proposta de melloras na súa sinalización.
Como parte da solución, apostarase polo reciclado de materiais, reparación e vinilado de sinais en bo estado e a creación de soportes tipo tótem que agrupen a información e reduzan o impacto visual. Todo será adaptado ao Manual de Sinalización de Galicia, buscando unificar estilos e terminoloxías. A empresa Benito Urban S.L. executará o proxecto cun orzamento de 106.424,70 €, financiado polo Plan de Sustentabilidade Turística de Ribeira dentro do Plan de Recuperación da UE Next Generation. O prazo de execución será de 4 meses.
