Os grupos municipais do PSdeG-PSOE, BNG, Marea Cidadá de Noia e o concelleiro non adscrito Luis Alamancos Pampín presentaron este luns de forma oficial unha moción de censura contra o actual alcalde de Noia, José Santiago Freire Abeijón (PP). A iniciativa conta co apoio de nove concelleiros, o que representa a maioría absoluta do pleno, e cumpre os requisitos legais establecidos pola Lei Orgánica do Réxime Electoral Xeral (LOREG), así como o criterio marcado pola Sentenza do Tribunal Constitucional 134/2025.
A moción ten como obxectivo, segundo os seus promotores, “restaurar a legalidade institucional, recuperar a confianza cidadá e impulsar unha xestión pública baseada na transparencia, a planificación e o ben común”.
Críticas á xestión do actual goberno local
Na exposición de motivos, os asinantes denuncian a existencia dunha situación de deterioro institucional e acusan ao goberno de Freire Abeijón de falta de transparencia, “uso abusivo da contratación menor” e inxestión económica, entre outros problemas. Apuntan á existencia de infraestruturas abandonadas ou infrautilizadas —como o centro de Abruñeiras, o albergue, a praza de abastos ou a piscina municipal—, así como unha situación financeira crítica, con débeda elevada, obrigas pendentes coa Mancomunidade, conflitos laborais e procedementos xudiciais que poderían supoñer un impacto económico superior aos cinco millóns de euros.
Tamén se sinala a inacción en áreas clave como igualdade, vivenda, servizos sociais e apoio ao tecido económico local, así como a ausencia de proxectos de futuro e planificación estratéxica.
Francisco Pérez Caamaño, candidato á Alcaldía
Como alternativa de goberno, a moción propón como novo alcalde a Francisco Pérez Caamaño, actual concelleiro do PSdeG-PSOE, quen conta co apoio dos catro grupos impulsores. Os asinantes destacan o seu perfil de consenso e compromiso con “un novo tempo de gobernanza dialogante, plural e efectiva”.
Pérez Caamaño comprométese a impulsar un executivo que aposte pola rexeneración institucional, a activación dos servizos municipais e o desenvolvemento de políticas públicas baseadas no interese xeral.
Un novo rumbo político
Os promotores da moción destacan que esta medida responde a un exercicio de responsabilidade política, máis alá das siglas. “A veciñanza de Noia merece un goberno que planifique, que renda contas e que poña os intereses colectivos por riba das inercies partidarias”, sinalan.
En declaracións públicas, o candidato Francisco Pérez afirmou:
“Esta moción de censura é un exercicio de responsabilidade política. Queremos devolverlle á xente de Noia un Concello á altura das súas aspiracións, e abrir un novo tempo de goberno útil, dialogante e con proxecto”.
A tramitación da moción seguirá agora os prazos legais establecidos, á espera do seu debate e votación no pleno municipal, que podería dar lugar a un cambio na Alcaldía de Noia nos vindeiros días.
