Portugal combate 17 incendios de alta gravidade, con miles de efectivos despregados no norte e centro do país
Portugal enfróntase a unha situación crítica con 17 incendios de “gravidade elevada” activos, alimentados polas altas temperaturas e os fortes ventos que azoutan o país nos últimos días. Os lumes afectan especialmente ao norte e centro, con zonas próximas á fronteira con Galicia e Estremadura ameazadas polas chamas.
Segundo informou o comandante da Autoridade Nacional de Emerxencia e Protección Civil (ANEPC), Mário Silvestre, os incendios de Ponte da Barca e Penamacor, que anteriormente se atopaban controlados, reactiváronse nas últimas horas. En Ponte da Barca, o lume avanza pola Serra Amarela, mobilizando a 416 bombeiros, 134 medios terrestres e catro aeronaves.
O mesmo ocorre en Penamacor, preto da provincia española de Cáceres, onde o vento, que virou cara ao nordés, abriu un dos flancos do incendio. Alí traballan 399 bombeiros, 130 vehículos terrestres e cinco medios aéreos.
A situación máis preocupante, con todo, dáse en Aoura, a uns 60 quilómetros ao sur do Porto. O lume pon en risco as localidades de Castanheira, Arouca e o municipio de Mespreira. Neste punto están despregados 749 bombeiros, 257 vehículos e sete aeronaves, nun esforzo intensivo por evitar que as chamas cheguen ás zonas habitadas.
Tamén se declarou un novo incendio en Nisa, preto da raia con Estremadura, ás 15:00 horas. Foi descrito como “dominando polo vento, con altas velocidades de propagación”. Neste incendio participan 326 bombeiros, 104 medios terrestres e catro aéreos.
Ao longo da xornada, 20 persoas precisaron atención médica, entre elas 14 bombeiros, aínda que todos se atopan ben e con feridas leves, segundo confirmou o comandante Silvestre.
En total, Portugal mobilizou 3.753 bombeiros, 1.200 medios terrestres e 37 aeronaves para loitar contra os múltiples incendios que asolan especialmente o norte e centro do país, nunha das xornadas máis duras da presente campaña de incendios forestais.
