Os barcos que faenan en caladoiros de NAFO vense obrigados desde hoxe a permanecer á capa ata o luns se chegan a porto en fin de semana. Tamén deben agardar ao primeiro día hábil seguinte a festivo, no caso de que a chegada do pesqueiro a porto cadre cun día inhábil. É a resposta máis axeitada que da a Administración a un conflito laboral no que está en xogo a especial dispoñibilidade que tiñan ata o de agora os funcionarios de servizo na inspección de pesca marítima. É, asimesmo, a resposta que da a Administración á tan reclamada remuda xeracional na que os armadores cifran a posibilidade de recuperar a capacidade pesqueira das unidades de pesca.
Un conflito laboral no servizo de inspección pesqueira que xera un grave problema nun sector sumamente necesitado de atención. Por unha banda, para os inspectores de pesca, aos que se lles priva de parte dun salario que a outros se lle mantén, e pola outra aos tripulantes da frota de NAFO que, após tres meses continuados de marea, teñen que facer cadrar a súa chegada ao porto base con día non festivo ou fin de semana.
Os inspectores pesqueiros deben ter razóns abondo para protestar pola retirada da paga de especial dispoñíbilidade, mais que teñan que ser os tripulantes dos pesqueiros os que paguen as consecuencias das desavinzas entre funcionarios e administración, semella un caso inxustificado, cando menos.
Axustar os intereses laborais duns ás condicións de vida dos que están no mar e, polo medio, as familias destes non é outra cousa ca un despropósito ao que alguén debe por remedio canto antes.
