En numerosos pobos e cidades de España e Europa están orgullosos da presenza de familias de inmigrantes, procedentes de países onde non teñen ningún tipo de oportunidade de poder vivir decentemente. Persoas e familias que chegan en busca dunha oportunidade de formación, traballo e poder crecer en liberdade. Saben, e son conscientes diso, de que moitas empresas e negocios non poderían funcionar ou abrir as súas portas sen a presenza de persoas migrantes.
Moitas desas persoas inmigrantes realizan traballos fundamentais de coidados no fogar; de persoas dependentes; coidado de nenos; na hostalería; no comercio; na pesca; no campo; na recollida da froita e moitos outros traballos que non necesitan moito especialización e que os cidadáns, dese país, non queren realizar.
Facendo uso da experiencia persoal e familiar, con decenas de familias migrantes, dicir que maioritariamente son persoas tranquilas, educadas, traballadoras e solidarias coa súa contorna. Saben que se atopan, nun país estraño con diferentes costumes e radicais maneiras de pensar. A pesar diso adáptanse e respectan a contorna. Quizais, algúns, non se integran o que deberían na sociedade e relaciónanse exclusivamente coas persoas do seu propio país.
O que está a suceder, nestes últimos días, en certos lugares de España, co chamada “caza ao inmigrante”, son accións de odio e de puro fascismo que debería ser perseguido e penado xudicialmente.
