Proseguen os traballos de ampliación de servizos básicos na parroquia de Castiñeiras, impulsados dende o Goberno local. Sen ir máis lonxe, esta primeira semana de xullo o Concello de Ribeira adxudicou unha actuación para estender a rede de recollida de augas pluviais e nova pavimentación das rúas Revolta e Fonteseca da parroquia de Castiñeiras.
O Concello lembra que as rúas Revolta e Fonteseca presentan na actualidade un pavimento de aglomerado moi deteriorado debido principalmente ao efecto das augas superficiais sobre o mesmo. Para solucionar este problema proxéctase a instalación dunha rede de pluviais e a renovación do pavimento de ambas vías.
Na rúa Revolta instalaranse 285 m de lonxitude de tubo de PVC e estenderase unha capa de 6 cm de mestura bituminosa en quente. Na rúa Fonteseca instalaranse 80 m de lonxitude de tubo de PVC e pavimentarase cunha capa de formigón puído de 15 cm de espesor.
Na actuación da rúa Revolta demolerase parcialmente o pavimento actual, para a nova rede de pluviais farase unha escavación en gabia cunha instalación tubaxe para condución de auga pluviais, colocación de pozos de rexistro, arquetas sumidoiro e entroncamento coas redes existente. Na pavimentación acondicionarase a superficie, previo á aplicación dos pavimentos que será de capa de saburra artificial de 10 cm de espesor para finalizar co aplicación de capa final de aglomerado asfáltico, en toda a superficie.
Na rúa Fonteseca farase tamén a demolición parcial do pavimento de formigón actual e terá unha rede de pluviais de iguais características que a mencionada anteriormente.
O contrato de execución das obras do proxecto adxudicouse á empresa Excavaciones Nima, S.L., cun prezo total do contrato de 91.054,64 euros e cun prazo execución de 4 meses; financiado polo POS+ 2024.
Investimentos por valor de 551.000€ en dous anos
O alcalde de Ribeira, Luís Pérez Barral, destacou que “esta actuación é un paso máis na nosa aposta decidida pola mellora das parroquias, para que conten con servizos de calidade”. A esta intervención súmanselle a outras actuacións xa executadas ou en plena execución, como a mellora da contorna da Ameixida, cun investimento de 163.000 euros ou a pavimentación da rúa Curros, dotada dun orzamento de 88.000 euros ou a renovación do paseo dos Mosqueiros con 200.000€. “Estamos investindo na parroquia de Castiñeiras máis de 551.000€ e pretendemos seguir ampliando actuacións que permitan que a veciñanza ter maior calidade de vida. Seguiremos a traballar priorizando aquilo que nos demandan os veciños e veciñas”, concluíu o alcalde.
