Corrupción e máis corrupción, na política, na empresa, na banca, na xustiza, na vida mesma. É un mal endémico, que envolve a todas as sociedades modernas, libres e democráticas. O que coñecemos, nos últimos días, a través das mafias dentro do Ministerio de Facenda, con Montoro como ministro, é algo inhumano. Mentres miles de familias pasaban necesidades, perdían as súas vivendas e tiñan que acudir a entidades benéficas, un grupo de desvergonzados enriquecíanse e beneficiaban a unhas cantas grandes empresas.
Non resulta estraño, que a dereita política, nunca estea a favor de incrementar os impostos, nin de maneira extraordinaria ou excepcional, ás grandes empresas eléctricas, gasistas e financeiras. Si traballaron, como se está demostrando, durante anos para elas, no canto de preocuparse de xestionar o público para beneficio da cidadanía e dedicáronse a incrementar os millonarios beneficios desas grandes empresas, a cambio de comisións. Era un segredo a voces, pero ninguén tiña a valentía de denuncialo.
Centenares de familias, en España, desde o ano 2008 sufrían problemas hipotecarios coas súas respectivas entidades financeiras. Ninguén lles axudaba, o Goberno da dereita dicía que era un problema particular, entre a familia e o banco, polo incumprimento do asinado na hipoteca. Non lles preocupaba que houbese miles de desafiuzamentos de vivendas habituais e que quedasen coa débeda, sen ter dereito á dación en pago. Miraban para outro lado, mentres se suicidaban decenas de persoas a causas deses desaloxos inxustos, insolidarios e ilegais en moito casos.
