As comarcas das Rías Baixas e a comarca de Santiago de Compostela comezarán a semana baixo a influencia das altas presións, que manterán un tempo maiormente estable na metade sur de Galicia durante a xornada do luns.
Agárdase un ceo pouco nubrado ou despexado ao longo do día nestas zonas, cunha mañá marcada pola presenza de bancos de néboa en puntos interiores, especialmente nas proximidades da capital compostelá. Estas néboas iranse disipando co avance da mañá, deixando paso a un ambiente seco e con boa visibilidade.
As temperaturas mínimas manteranse sen cambios significativos, mentres que as máximas experimentarán un lixeiro descenso, especialmente nas áreas máis próximas ao litoral(26-30 graos). A sensación térmica continuará a ser agradable, aínda que algo máis fresca en comparación coas xornadas anteriores.
En canto ao vento, predominará o nordés, soprando con intensidade moderada na maior parte do territorio e refachos fortes no litoral atlántico, especialmente nas zonas costeiras das Rías Baixas.
Mentres tanto, na metade norte de Galicia o ceo estará máis cuberto, con posibles orballos no litoral norte debido ao paso dunha fronte pouco activa. Con todo, a partir do mediodía tamén alí irán abrindo claros.
O noso mar: Vento do norte á mañá, do norte á tarde e do nordés á noite, forza 3 a 5 á mañá, 4 a 6 á tarde e 5 a 7 á noite. Marusía á mañá e forte marusía á tarde e á noite. Visibilidade boa. Mar de fondo do noroeste á mañá e norte á tarde e á noite, con ondas de 1 a 2 metros á mañá e 2 a 2.5 metros á tarde e á noite.
