A vila de Muros celebrou con gran éxito de público e participación a vixésima edición das xornadas Muros Mira ao Mar, un evento xa consolidado no calendario cultural e turístico da comarca, que rende homenaxe á tradición mariñeira do municipio.
A alcaldesa de Muros, María Lago, destacou o orgullo que supón para o municipio acoller esta celebración: “A esencia destas xornadas é o noso orgullo como vila mariñeira, dando a coñecer a nosa cultura e poñendo en valor o mar, que é o noso ben máis prezado”.
Lago tamén quixo agradecer “a implicación da veciñanza e do tecido asociativo nesta festa, que non sería posible sen a súa colaboración e entusiasmo”.
Como broche final á programación, esta noite celebrarase o Festival Folclórico, que contará coa actuación da Agrupación Folclórica Ximiela, a Asociación Cultural Ponte Vella, o Grupo de Música Tradicional de Outes, As Carameleiras do Tremuzo e a Asociación Cultural Princesa Dácil.
