Galicia rexistrou nos seis primeiros meses do ano as mellores cifras turísticas da última década, segundo os datos publicados polo Instituto Nacional de Estatística (INE). En total, 2.967.407 viaxeiros visitaron a comunidade, acumulando 4.961.113 pernoctacións en establecementos turísticos galegos.
O director de Turismo de Galicia, Xosé Merelles, destacou que estas cifras supoñen un aumento do 4,5% en número de viaxeiros e do 3,8% en noites, o que confirma o avance nas políticas de desestacionalización do turismo, cunha demanda crecente tamén fóra da tempada alta.
Merelles tamén salientou o crecemento do turismo internacional, que xa representa o 39,6% dos visitantes, cun incremento do 5,5% respecto ao mesmo período de 2024.
En xuño, Galicia acadou 814.138 viaxeiros (un 6,7% máis) e superou o 1,4 millón de pernoctacións (un 7% máis). En canto á procedencia, o 57,6% dos turistas foron nacionais e o 42,4% internacionais.
Recoñecemento ao Gran Talaso Hotel Sanxenxo
No marco desta presentación de datos, Merelles fixo entrega do selo Galicia Calidade ao Gran Talaso Hotel Sanxenxo, destacando o seu modelo baseado na autenticidade, confort e identidade galega. O hotel, situado na praia de Silgar, ofrece unha ampla zona de spa, tratamentos de benestar e unha gastronomía baseada en produto local, consolidándose como un referente do turismo sostible e de calidade nas Rías Baixas.
O Gran Talaso convértese así no único talaso galego con este distintivo, sumándose aos balnearios de Caldaria en Arnoia, Laias, Lobios e Abadía. Galicia conta actualmente con 20 balnearios e 4 talasos, conformando unha potente oferta termal.
