Un partido político que quere gobernar España -con ou sen a participación do PP no Goberno- percura convencer á cidadanía de que o mellor para acadar este obxectivo é a expulsión de España de oito millóns de migrantes “ilegais”.
A proposición parte de Vox, que aposta por ese “proceso” porque hai, dixo a deputada Rocío de Meer (un apelido nada español, por certo), “algo máis importante que preservar e que amais temos o dereito a querer sobrevivir coma pobo”: preservar a identidade española”, dixo tamén a parlamentaria ultradereitista.
Segundo Vox, se nos anos 90 a porcentaxe de poboación en España era de entre o 1 e o 2%, na actualidade “estamos a asistir a millóns e millóns de persoas que viñeron desde os anos 90 ata o de agora alentados polo bipartidismo”.
Para Vox, as fronteiras españolas “están abertas” e, polo tanto, afirmou a parlamentaria, entre 7 e 8 dos 47 millóns de habitantes que ten España viñeron de distintos países “en moi curto período de tempo”.
Para de Meer é “extraordinariamente difícil” que todas esas persoas poidan “adaptarse” ao que Vox coida coma “usos e costumes” españolas: a nosa sociedade está a mudar (ao seu xuízo), as nosas rúas en moitas ocasións non son españolas e resulta necesario un “proceso” de deportación “masiva” de persoas migrantes para “preservar a identidade española”.
Segundo os cálculos de Vox, no noso país hai máis ou menos 7 ou 8 millóns de persoas procedentes doutras nacións (cifra desmentida oficialmente). Pero non se fai mención aos milleiros de españois (nomeadamente galegos, canarios e andaluces) migrantes -legais ou ilegais- que entre os séculos XIX e XX asentaron en Latinoamérica, USA, Suiza, Alemaña, Inglaterra, Bélxica, etc., disputando os postos de traballo que poderían ocupar os nacionais.
Isto non interesa mencionalo.
