Onte celebrouse o acto inaugural da exposición “Antoloxía Debuxada III” na sala do Centro Cultural Lustres Rivas, dentro da programación cultural “Lecer na Ribeira” promovida polo Concello. A mostra reúne o traballo de seis artistas locais: Maralla, Antonio Pérez, Xoán Fernández, Teresa Ramallo, Uxía Fernández e Xerardo Crusat, ofrecendo un total de 60 pezas con estilos e temáticas variadas unidas polo fío condutor do debuxo.
O acto contou coas intervencións do xestor cultural municipal Unai González Suárez, da Concelleira de Cultura, Antía Alberte Maneiro, e dos artistas Teresa Ramallo e Antonio Pérez, que compartiron reflexións sobre a mostra e o proceso creativo. O evento pechouse cun momento musical moi especial a cargo de Uxía Fernández, quen interpretou unha peza tradicional cantando e tocando a lata, que emocionou ao público asistente.
Máis dun cento de persoas asistiron ao acto, arroupando aos artistas nun ambiente de cercanía e recoñecemento. Todos os presentes recibiron un catálogo da exposición, editado pola Área de Cultura do Concello de Ribeira, como recordo desta antoloxía.
A exposición poderá visitarse ata o 30 de agosto, con entrada gratuíta, en horario de luns a venres de 9:00 a 14:00 h e os sábados de 12:00 a 14:00 h.
Unha oportunidade única para coñecer o talento artístico local e desfrutar da riqueza creativa da comarca.
