Como xa informou este xornal, Ribeira acubillará unha vez máis ás numerosas embarcacións participantes no Encontro de Embarcacións Tradicionais (que neste ano acada a súa XVII edición). Será entre o 17 e o 20 de xullo, con conferencias, coloquios, exposicións, publicacións, música e danzas tradicionais, actos culturais e de lecer, que a todos permitirán lembrar ou coñecer un sistema de navegación que foi medio de vida que, aínda que a día de hoxe non se practica en exceso, siforma parte dunha tradición que non pode nen debe ser esquecida. Tanto polo que a navegar atinxe como polo que ao oficio de carpinteiro de ribeira corresponde.
As que virán a Santa Uxía de Ribeira serán as tradicionais dornas (de diverso tipo) propias das Rías Baxas, aos galeóns, traiñeiras, gamelas, etc. típicos de Galicia, Portugal, Irlanda, Francia, Euskadi, Catalunya, Andalucía ou as Illes Balears.
Non será esta a primeira vez que Ribeira a os ribeirenses comparten experiencias neste senso, non obstante teren compartidos séculos de navegación a remo e vela, así como a tradicional carpintaría de ribeira, especialmente abundante na costa galega ou nas do Mediterráneo e o Cantábrico, ao igual que en Portugal, Francia, etc.
Se ben é certo que hoxe non se practica, o oficio de carpintaría de ribeira acada novos folgos grazas, en boa medida, a eventos coma o que Ribeira vai vivir ese catro días do vindeiro mes de xullo.
A construción e reparación artesanal de embarcacións de madeira coma as citadas teñen en común -entre outras cousas.- o uso da azuela, unha ferramenta que coñecín persoalmente na carpintaría de ribeira de Feás (Cariño), onde ao igual ca en Ribeira (estaleiro de Saavedra), Rianxo, Boiro, Outes, se construiron fernosísimas e moi mariñeiras embarcacións de madeira. Esta ferramenta, moi manexábel, empregábase para desbastar a madeira (nomeadamente de carballo) empregada nas partes máis castigadas polo mar. A azuela componse dunha prancha de ferro aceirada e cortante, de dez a doce centímetros de anchura e un mango curto de madeira que forma recodo que é moi doado usar, motivo polo que debe estar perfectamente afiada.
