A famosa frase “Aqueles que non poden lembrar o pasado están condenados a repetilo” transmítenos a importancia de aprender dos erros do pasado para evitar que se repitan no futuro. Noutras palabras, se non aprendemos dos erros do pasado, corremos o risco de cometelos de novo, vivímolo novamente no Congreso dos Deputados, non aprendemos nada. O distanciamento político entre Goberno e oposición é insalvable nesta lexislatura ou o que quede dela. Por que non diálogo? Por que si corrupción? Xa para Platón o diálogo constituía a ferramenta máis adecuada para facer avanzar o coñecemento. Todo canto escribiu e pensou, fíxoo desde a crítica dialogada. No diálogo o que se atopa en xogo non son os intereses particulares, senón as ideas, as opinións de cada cal. Dialogar é o risco e a oportunidade de cambiar de opinión e sacarnos do noso erro, Pedro e Alberto “por Deus, diálogo”!
Son importantes as nosas orixes, a nosa historia e o noso pensamento, pero tamén é importante estar aberto a novas formas de pensar. Debemos apartarnos do noso ego e permitir que nos deixe avanzar e medrar como persoas, algo que lle custa aos actuais políticos, encerrados no seu mundo partidista.
É o momento de pasarnos ao apartidismo que permite partir sen un posicionamento preestablecido para alcanzar puntos en común, aquilo que poida ser proposto e executado para un ben común sen partir de premisas ideolóxicas. Volvamos ao “diálogo” fundamental para o desenvolvemento individual e colectivo, que nos permite a construción de relacións sólidas e a resolución de conflitos. É unha
ferramenta esencial para a convivencia pacífica e o progreso social, xa que facilita o entendemento a comprensión, e o respecto mutuo e o entre persoas. A polarización política que se vive no país está a levar á fartura cidadá ante os escenarios de crises prolongadas, corrupción e as promesas de cambios que non se materializan, o que fai que as institucións en xeral atravesen un momento de cuestionamento moi severo por parte da cidadanía. Máis cando vemos que unha das institucións máis importantes do país, o maxistrado do Tribunal Supremo Ángel Hurtado, puxo este luns ao fiscal xeral do Estado ao bordo do banco. Mentres os partidos políticos non fagan a súa parte , non hai moito que facer, no sentido de que a democracia ”comeza a facer augas”. Se queremos coidar a democracia, é necesario coidar a quen decidimos que nos gobernen cada catro anos, estes falarán no noso nome e serán os nosos representantes.
