Preto de 250 persoas participaron no xantar de confraternidade organizado pola Asociación Club de Xubilados de Lousame, en colaboración co Concello de Lousame, e que tivo lugar nunha carpa instalada na contorna do seu local en Aldeagrande.
O tempo acompañou e os maiores desfrutaron dun menú composto por polbo, carne ao caldeiro, empanada e orella á feira a cargo da Polbeira Crisóstomo (Vila de Cruces). O grupo noiés Aires de Broña puxo a nota musical e non foron poucos os que se animaron a botar unhas bailas tras o xantar. Ao acto asistiron os concelleiros de Obras, Ramón Martínez; Deportes, Mariel Agrafojo; e Protección Civil, José Antonio Ces.
