O PSOE de Rianxo emitiu un comunicado no que critica que “o Goberno local renuncia ao Orzamento de 2025”. Segundo din, “a decisión de non impulsar as contas non só supón o incumprimento da súa promesa electoral de aplicar a Relación de Postos de Traballo (RPT), senón que perpetúa unha situación de caos orzamentario, impagos e falta de transparencia”. No grupo indican “que queremos deixar claro que non pretendemos unha RPT aprobada só sobre o papel, senón a súa aplicación real e efectiva, con dotación económica suficiente e vontade política firme para mellorar as condicións laborais do persoal municipal. A renuncia do alcalde a dotar ao Concello dun novo Orzamento fai imposíbel avanzar neste obxectivo”.
Critican que o Orzamento prorrogado de 2024 “está completamente desfasado”, “con partidas infravaloradas e sen capacidade para responder ás necesidades reais do municipio, o que obriga á alcaldía a formular modificacións de crédito constantes e a levantar reparos da intervención de xeito
continuado”. A consecuencia directa desta situación, continúan, “é que empresas, comerciantes, asociacións e clubs deportivos levan máis dun ano sen cobrar moitas das facturas que se lles adebedaban”. Critican tamén que “a alcaldía incumpre os prazos legais establecidos para a presentación de
documentos fundamentais como o informe de execución orzamentaria de 2024, que debía estar dispoñíbel antes do 31 de marzo”.
E engaden: “Desde o grupo socialista reclamamos que se faga pública a débeda do Concello en relación coas facturas pendentes de pago, e que se elabore un documento oficial, accesíbel á veciñanza, que amose claramente onde se gastan e como se gastan os cartos públicos. É imprescindíbel garantir transparencia e rendición de contas”.
