O grupo do Partido Popular defenderá no Senado as reivindicacións do sector pesqueiro da provincia de A Coruña “que coinciden coas principais necesidades do sector a nivel nacional” que e “están estreitamente relacionadas co relevo xeracional, a necesidade da homologación de títulos e igualar condicións fiscais con respecto a outros países”, así o fixo saber a delegación de senadores do Grupo Popular na Comisión de Pesca do Senado, na que se atopa o ribeirán Manuel Ruiz Rivas. O grupo cre “necesario establecer exencións fiscais de ata 60.000 euros para barcos que leven a bandeira española en augas internacionais”. Comprometeuse ademais a dar traslado das demandas dos distintos actores do sector pesqueiro tras escoitar de primeira man aos seus representantes do sector (patróns maiores das confrarías da provincia).
“Os problemas da pesca nos que máis inciden todos e cada un dos seus actores é a remuda xeracional”, apuntou Ruiz Rivas, portavoz do Grupo Popular na Comisión de Pesca no Senado, que asegurou que algunhas das demandas máis urxentes do sector son “facilitar a obtención de títulos, especialmente para a xente que ten experiencia no mundo do mar, así como revisar as condicións para a homologación de títulos doutros países e adaptar a formación ás necesidades do sector facilitando que os traballadores do mar poidan chegar facilmente a ser uns tripulantes cualificados”.
O popular avanzou que “estamos dispostos a defender un marco estatal único e harmonizado de titulacións náutico-pesqueiras que garanta o seu recoñecemento automático en todo o territorio nacional”.
Por outra banda, recalcou Rivas o sector reclama a aplicación das mesmas medidas fiscais para as empresas españolas que noutros países europeos. “Xa temos rexistrada unha iniciativa para reclamar exencións fiscais de ata 60.000 euros para aquelas tripulacións que operan con bandeira española en augas fóra do noso territorio nacional”, indicou o senador popular.
A ese respecto, o Grupo Popular ten presentado unha proposta para instar ao Goberno de España a ampliar a exención tributaria do IRPF e modificar parcialmente as leis dos Impostos sobre Sociedades, Imposto da Renta para No Residentes (IRNR) e sobre o Patrimonio aos tripulantes españois en buques de bandeira española que faenan fóra das augas españolas. “O obxectivo é o de estimular o relevo xeracional e, sobre todo, evitar a fuga de talento para países con condicións fiscais máis favorecedoras”, concluíu Rivas.
