Este domingo, 8 de de xuño, o mar acendeu catro mil millóns de velas. Con elas celebramos o Día Mundial dos Océanos xa que logo, na súa condición de berce da vida que ven ser o mar, resulta obrigado sermos conscientes da nosa responsabilidade porque nós, os humanos, somos os verdadeiros responsábeis do seu esgotamento, da súa contaminación sen límites e da súa destrución de xeito irresponsable. Inconscientemente, poñemos en risco o noso futuro e o de moitas especies de vida das que dependen moitas das nosas.
Como lembra WWF, mares e océanos subministran máis da metade do osíxeno que respiramos. E con el, alimentos, medicinas e medios de vida para milleiros de millóns de persoas.
Son os océanos un inmenso sumidoiro do CO2 que emitimos á atmosfera e que, obrigadamente, deberiamos protexer polo noso propio interese.
E no canto de coidalos, contribuímos a ameazalos pola acción do home: sobreexplotación pesqueira, turística, mineira, quecemento global, especies invasoras e perda de biodiversidade, tráfico mariño, vertidos e contaminación por plásticos.
Cada ano vertemos á natureza máis de 100 millóns de toneladas de residuos plásticos. Desta cantidade, a décima parte chega ao mar e moitas serán convertidos en microplásticos da nosa comida. Amais, este tsunami formado por plásticos -lembran os ecoloxistas- dun só uso, artes de pesca abandonadas ou redes pantasmas, afectan ao 45% dos mamíferos mariños en perigo de extinción e ao 90% das especies mariñas. Nun só ano máis de 100.000 animais mariños morren atrapados, asfixiados ou envelenados, máis de 270 ao día!.
De non frealo, a contaminación mariña por plásticos vaise cuadruplicar no ano 2050 e o Mar Mediterráneo e o xeo mariño Ártico serán zonas críticas que xa superan o limiar perigoso de concentración de microplásticos.
Se queremos unha pesca sostible debemos colaborar en facer que os océanos sexan a nosa maior fonte de vida. En maior medida onde, coma no Barbanza, o gran protagonista da vida é o mar. Que o Día Mundial dos Océanos, celebrado este domingo, sexa reclamo para promover o cambio que reclaman os mares.
