O Grupo Parlamentario Popular no Senado, a iniciativa da súa voceira de Pesca, o ribeirense Manuel Ruiz Rivas, rexistrou unha moción para o seu debate en Comisión na que reclama ao Goberno de España que inicie de forma inmediata o procedemento de esixencia de responsabilidade medioambiental previsto na Lei 26/2007, do 23 de outubro, tras a vertedura de granulados plásticos ocorrido o 8 de decembro de 2023 en augas internacionais fronte á costa de Viana do Castelo (Portugal).
Esta vertedura, ocasionado polo buque Toconao, provocou en palabras do PP “unha crise ambiental no noroeste español, especialmente en Galicia”. O grupo lembrou que “a Xunta activou o Plan Territorial de Continxencias por Contaminación Mariña Accidental (Plan CAMGAL), mobilizando máis de 300 efectivos en 56 praias de 34 concellos, logrando retirar máis de cinco toneladas de bólas plásticas e 20 toneladas de residuos”. O custo destes labores foi estimado pola Xunta nuns 2,3 millóns de euros.
O 19 de xaneiro de 2024, a Xunta solicitou ao Goberno central o inicio do procedemento de esixencia de responsabilidade medioambiental á armadora do buque, conforme o artigo 41 da Lei 26/2007. Explicou o grupo no Senado que “ante a falta de resposta no prazo legal de dez días hábiles, considerouse producido o silencio administrativo negativo, e desde entón non se recibiu resposta substantiva por parte do Ministerio para a Transición Ecolóxica, a pesar de comprometerse a dar unha contestación tras a reunión mantida o 26 de febreiro co secretario de Estado de Medio Ambiente, Hugo Morán Fernández”.
O Grupo Popular no Senado presentou a seguinte moción para o seu debate en Comisión:
MOCIÓN
1- “Ao amparo do disposto no artigo 41 da Lei 26/2007, do 23 de outubro, de responsabilidade medioambiental, iníciese de forma inmediata un procedemento de esixencia de responsabilidade medioambiental como consecuencia da vertedura ao mar de granulados de plástico producido en augas internacionais o día 8 de decembro de 2023, polos posibles danos medioambientais causados ao dominio público marítimo-terrestre”.
2- “Este procedemento tería por obxecto a identificación dos suxeitos responsábeis, a avaliación dos referidos danos medioambientais, a definición das medidas de prevención, evitación e reparación e a repercusión dos custos das medidas adoptadas polas autoridades autonómicas e locais”.
3- “O Goberno de España deberá tomar cantas medidas fosen necesarias para evitar que as autoridades autonómicas e locais teñan que acudir á xustiza ordinaria na reclamación dos custos causados na reparación dos danos ambientais causados na costa”.
4- “Instar ao Goberno de España a que defenda ante as autoridades Comunitarias un endurecemento da lexislación correspondente ao transporte marítimo que conte con este tipo de materiais para que se faga de forma máis responsábel e segura para as nosas costas”.
