O Concello de Ribeira informou do inicio dos traballos para instalar unha nova cuberta na bancada norte do Campo de Fútbol da Tasca, en Aguiño. Así o confirmou o concelleiro de Obras, Xabier Vidal, que visitou a parroquia de Aguiño para supervisar os traballos que, segundo dixo, comezaron este mesmo mércores 25 de xuño. O concelleiro explicou que a cuberta da grada xa tiña un desgaste estrutural por mor do salitre e a intemperie, “xa que este campo está a cen metros do mar aberto”. A maiores, a mesma cuberta o 8 de marzo coa borrasca Jana sufriu un desprendemento dunha chapa metálica duns seis metros de longo, soltouse e quedou só agarrada por unha única ancoraxe, co que corría serio perigo de saír voando. Daquela, os bombeiros do Parque de Ribeira, coa colaboración dos membros do GAEM, subiron á cuberta para quitar esa chapa metálica que deixou á bancada sen seis metros de cuberta.
Polo tanto a Concellería de Obras está nestes días, procedendo á proxección dunha nova estrutura para integrar o novo material da cuberta que irá co
acabado en HPS (High Pressure Laminate) cunha garantía de 20 anos.
