Será este sábado, 21 de xuño, cando Boiro acolla unha nova edición do Festival Aloumiño, un festival para toda a familia con actividades e actuacións pensadas para o público infantil e familiar que se levarán a cabo na rúa peonil e no paseo marítimo de Barraña.
Indo ao programa do festival, dicir que as actividades darán comezo ás 11.30 horas da mañá na rúa peonil con dous obradoiros de Sisel Animación: Maquíllate en galego e No fondo do mar, tamén haberá xogos a cargo da entidade inclusiva Amicos. Ás 12 horas terá lugar o espectáculo Ecoralia a lambona ecolóxica, de Pakolas e a partir das 13 horas pasarrúas de Iguatuke.
Pola tarde retomaranse as actividades no paseo marítimo de Barraña, a carón do edificio das Colonias con Percubebés: O Alcacaque, a divertida aventura de Pelán que comezará ás 17 horas. Ás 17.30 horas, xogos populares miudíño; ás 18 horas As tareixas: A cadeira da avoa; ás 19 horas Charlatán Rodríguez, de Rendos Pequeno e para rematar ás 20 horas Circo Cambuche, de Henriko.
Para rematar sinalar que todas as actividades serán de balde e non requiren inscrición previa.
